Er tida ein linjal eller ein sirkel?
Sekund forsvinn etter kvart sekund.
Eg kjenner hjartet hamre og må hive etter pusten.
Det kjennes som om alt hastar.
Med venner, karakterar, med å bli lovleg.
Med å kome lengst mogleg på 12 minutt.
Alle andre spring så fort,
framover,
medan eg berre rotar
rundt.
Minutt forsvinn etter kvart minutt.
Kanskje tida er rund?
Eg stoppar opp for å få igjen pusten.
Let dei andre springe nokre rundar utan meg.
Lyttar og kjenner etter.
Kanskje finn eg noko inni meg som eg ikkje visste var der?
Mitt uttrykk. Min måte å gjere det på.
Det er jo eg som skal vere her
for meg,
heilt inst,
til slutt.